47º aniversario

 

Boas a todos os nosos seguidores no 47º aniversario da nosa banda infantil.

Que fermoso capítulo da vida o noso paso pola banda!

Para cada un de nós foi unha experiencia única e penso que embarcarse

 nesta aventura resultou ser do máis positivo e beneficioso

 para as nosas vidas.

Para rematar por hoxe, aquí deixo unha cita sobre os recordos

 e a música:

“Os nosos recordos da infancia son a miúdo

 fragmentos, breves momentos ou encontros, que

xuntos forman o álbum de recortes da nosa vida”.

Edith Eger

“En ocasións a música ten o poder de revivir os recordos con tal intensidade

 que a un ata lle doe o corazón”.

Haruki Murakami

Grazas por visitar o noso blog.

Charo T.

Día dos músicos

 Bo día da patrona dos músicos.

Hoxe volvemos ó pasado con esta foto de pasarrúas en Campos de Pazos. Había que ver canta vida lle dabamos a este currucho de Taragoña con aquel vai e ben de rapazada acudindo a diario ós nosos ensaios! Canta nostalxia...!

Un saúdo ós nosos seguidores. Grazas por visistar o noso blog.

Charo T.

46º Aniversario

Un saúdo a todos os nosos seguidores. Volvemos para recordar.

Temos na memoria aquel 8 de decembro do 78, a presentación da nosa banda. Aqueles foron anos marabillosos que son recordados con moita nostalxia. O vello cine era o noso punto de reunión para os ensaios; eu recordo chegar da escola, merendar e coller o estuche co clarinete e saír disparada para Campos de Pazos, apenas paraba na casa!  Eu creo que para todos nós naqueles anos a vida xiraba principalmente en torno a aquel local e todos tiñamos unha ansia enorme de chegar alí canto antes para estar xuntos tanto para xogar como nas leccións de solfeo e logo no ensaio xeral, con descanso incluido, e nunca había presa por marchar para a casa. Así pasaron uns cantos anos da nosa vida musical: ensaios a moreas, actuacións e polo medio un montón de aventuras que nunca imos olvidar. Hai que ver a de rapaces e rapazas que nos xuntamos de todas as aldeas de Taragoña e incluso viñan doutras parroquias; naquel momento creouse un preciado vínculo entre nós e o resto xa é historia.

Meus compañeiros! Xa choveu desde os anos da banda!

Hoxe tamén fai 10 anos daquela reunión do 2013, outro día moi especial que supuxo unha xuntanza case xeral despois dos 36 anos desde o concerto inaugural.

O seguinte é o enlace das fotos daquel día:

https://bandainfantiltaragonha.blogspot.com/2013/12/fotos-8-decembro-2013.html

Grazas por visitar o noso blog.

Por Charo T.

Banda músicaTaragoña-música e paisaxe

Moi boas á xente que nos segue neste blog. Aquí vos deixamos este vídeo xa anteriormente compartido que mostra imaxes do noso pobo, Taragoña, e fotos da banda. Creado por CHANYLAND, o meu canal en youTube, para este blog. Podedes ver máis vídeos no enlace de abaixo.

https://www.youtube.com/user/chanyland/videos

Grazas por visitar o noso blog. Saúdos!

Na música eternamente

 

Hoxe é un día triste para a música pois deixóunos Paco o Lorcho, para min meu tío Paco, quen formou parte moi importante na historia da nosa banda e quedará na nosa memoria como un músico grande, membro da mítica familia dos Pinchudos.

Toda unha vida dedicada á música, sempre cun sorriso; cantos momentos todos xuntos rodando de pobo en pobo e cantas anécdotas no camiño.

 Que descanse na paz! Bicos ó ceo!

 

 

No ano 1980 dirixindo o festival de zarzuela.

Dirixindo na reunión do 2013.

No 40º aniversario da banda, ano 2017.

 

Por Charo T.

45º ANIVERSARIO

 

Un saúdo no 45º aniversario da banda infantil de Taragoña.

 Certamente, a vida sen música non sei se a podemos entender porque sempre estivo presente na vida do ser humano. A música fortalece, calma, evoca recordos, provoca emocións, conecta á xente e fainos sentir mellor pero mentres o mundo se deleita con melodías, detrás hai un músico adicando horas ó estudo e ó ensaio, sacrificando moito tempo da súa vida para que a humanidade sexa un pouco máis feliz.

 Que unhas notas musicais nos alegren sempre os días e nolos faga máis levadeiros.

 Aquí vos deixamos o recordo da nosa primeira actuación no 8 de decembro do 1977 e das nosas reunións no ano 2013, o 40º aniversario do CCD; no ano 2014 e no 2017, o 40º aniversario da banda.

 Grazas por recordar con nós e por visitar o noso blog.

 

 Por Charo T.

Bo día de Santa Cecilia

 Hoxe é Santa Cecilia a patrona dos músicos.

Aquí vos deixamos unha foto dos anos 80 tocando en Campos de Pazos diante do Centro Cultural, o noso lugar de ensaio.

Un saúdo a todos os nosos seguidores. Grazas por visitar o noso blog.

Por Charo T.

No libro dos músicos.

 

Un saúdo para os nosos seguidores!

Hoxe vimos cunha nova entrada no blog para anunciar que xa hai un libro adicado a tódolos músicos de Rianxo grazas ós autores Xesús Santos e Xosé Comoxo. Eles os dous no ano 2018 viñeron por A Laxe visitarme para falar sobre a nosa banda infantil. Eu comenteilles da existencia deste blog para que puidesen ver un pouco sobre a historia da banda.

Hoxe xa temos unhas páxinas adicadas no seu libro ó carón dos numerosos músicos que naceron neste noso concello.

Noraboa da nosa parte ós autores pola súa inmensa labor e grazas de corazón por incluirnos neste libro.

 

O sábado 9 de xullo asistín á presentación oficial do libro no auditorio de Rianxo e alí atopeime cunhas cantas caras coñecidas.

Aquí van unhas fotos dese día.

O compañeiro Martín e máis eu.

Por Charo Tarrío.

44º ANIVERSARIO / 1977-2021

 

Moi boas!

O noso pobo conta cunha extensa traxectoria musical e hoxe celebramos  xa o 44º aniversario da banda infantil de Taragoña, cuna de moitos grandes músicos e esperamos que esta tradición siga por moitos anos. A música en Taragoña é como un sinal de identidade e tén nomes propios. A banda infantil a finais dos 70 levou o nome do noso pobo por diferentes puntos da nosa Galicia e a actuación en “ 300 Millones” levounos a ser coñecidos alá en Sudámerica. Un orgullo! É un orgullo tamén o feito de seremos componentes desta mítica banda. Daquela fomos uns rapaces que  compartimos moitos anos estupendos de ensaios e actuacións e que ben o pasabamos todos xuntos…tanto que poderiamos ata escribir un libro coas anécdotas daqueles días! Que vivencias e cantos recordos…!  

 Que non nos falte nunca a música; sen ela, neste noso currucho, non sabemos vivir.

Un saúdo a todos os nosos seguidores e grazas por visitar o noso blog.

 

Por Charo T.